Un ano de www.biodiversidade.eu., algo máis que unha base de dados para a conservación da natureza de Galiza e Norte de Portugal.
Hai algo máis dun ano que se lanzaba www.biodiversidade.eu, unha plataforma promovida polo grupo de investigación do Departamento de Botánica dirixido polo profesor Santiago Ortiz Núñez, e resultado do proxecto BIODIV_GNP financiado con fondos FEDER do programa de cooperación transfronteiriza POCTEP. Nestes meses de vida, que inclúen períodos de testaxe e melloras, vai tomando forma a base de dados sobre a biodiversidade de Galiza e Norte de Portugal. Así no momento actual, a páxina recolle 2603 observacións de 262 especies vexetais e animais. No referente á flora ameazada, que era o eixo do proxecto orixinal, a base de dados ofrece xa a posibilidade de consultar a distribución coñecida das especies ameazadas e/ou endémicas deste territorio, distribucións nas que se basearan os mapas das máis de 100 especies que incluirá o Libro Vermello de Flora Ameazada de Galiza e Norte de Portugal. Este traballo coordinado, no que participaron máis de 30 especialistas en flora de ambos lados da fronteira, viuse complementado polas aportacións dos usuarios da páxina que compartiron a localización de novas poboacións ou núcleos de presencia de especies ameazadas como Genista ancistrocarpa, Rumex rupestris, Xiphion boissieri e Succisa pinnatifida.
www.biodiversidade.eu, busca non ser só unha base de dados de consulta, senón crear unha comunidade de usuarios entorno á protección da biodiversidade galego-portuguesa . Espazos para partillar novas e eventos relacionados co medio ambiente, coñecer e divulgar roteiros, coordinar proxectos e denunciar ameazas, consultar e partillar unidades didácticas son outras das posibilidades que ofrece a páxina web. Apoiado na difusión nas redes sociais (Biodiversidade Gz-Pt en Facebook e @biodiv_gnp en Twitter) o proxecto pula por chegar ao maior número de persoas posíbel e contribuír a conservación dos nosos valores naturais.
Agradecer o traballo de A Navalla Suíza desenvolvedores técnicos da plataforma.