A rota proposta permite achegarse a coñecer os valores naturais protexidos polas Microrreservas de Flora promovidas polo Concellos de Fisterra, en colaboración con ADEGA e a Universidade de Santiago de Compostela. O percurso é lineal dende a praia de Mar de Fóra até a praia do Rostro, con opcións sinalizadas de aproximación ás áreas das microrreservas. Nas mrcrorreservas de O Rostro e Arnela, os visitantes poderán coñecer a Labaza de Ribeira, (Rumex rupestris, planta protexida polo Catálogo Galego de Especies Ameazadas) e a singularidade da flora dos hábitats dunares.

Na microrreserva de Mar de Fóra, o protagonismo será para o Alyssum gallaecicum, tamén protexida polo Catálogo Galego de Especies Ameazadas, e que ten unha distribución moi restrinxida na franxa Atlántica entre Fisterra e O Grove. Esta especie será reintroducida na praia de Mar de Fóra, onde se ten constancia da súa presencia no pasado e onde non foi observada nos últimos anos. Esta reintroducción entronca co plano de recuperación proposto para a especie, recuperando antigas poboacións que contribuirán a súa conservación efectiva.