Comezou xa o período de cría da Píllara das Dunas ou Píllara Papuda (Charadrius alexandrinus), unha pequena ave limnícola que cría nas nosas praias. Esta especie inclúese no Catálogo Galego de especies ameazadas coa categoría de Vulnerábel, xa que nos últimos anos a súa presenza nos areais galegos tense visto moi reducida pola presión antrópica.

O plano de conservación aprobado para esta especie, inclúe medidas de balizado e protección dos niños detectados, medidas de protección que deben manterse até o mes de agosto, no que os polos xa comezarán a voar.

No caso de observar algún niño debe ser notificado a Xefatura Territorial de Conservación da Natureza e os axentes de conservación do distrito correspondente procederán á súa localización e balizado de consideralo necesario. Estas medidas adóptanse principalmente para aquelas postas observadas en zonas de elevada perturbación antrópica, como é o caso dos niños detectados na zona de areal das praias.

Onte pola tarde, axentes forestais do Distrito IV procedían a balizar niños observados en Río Sieira (Porto do Son) e Carragueiros (Boiro). Antonio Veiras, Axente forestal de Conservación, remítenos imaxes das actuacións realizadas na praia de río Sieira e nos conta un pouco en que consisten:

"- Primeiro colocamos unha malla metálica,  que permite o paso da parella reproductora para incubal, e que exclúe aos depredadores."

"- Posteriormentre delimítase unha zona con estacas e un cordel que delimita o espazo para impedir o acceso de persoas e se instalan cartaces informativos sobre a presenza desta especie en incubación"

A detección destes niños en zona de alto risco, foi posíbel grazas á colaboración de naturalistas locais que notificaron directamente á xefatura terriotorial da Coruña, ou ben a través da equipa do Departamento de Zooloxía da Universidade de Santiago de Compostela que participou na redacción do plano de conservación da especie.
Un exemplo de colaboración entre cidadáns, institucións académicas e administración, que é o eixo no que se vertebra o funcionamento de www.biodiversidade.eu.
                                           
Moitas grazas a Antonio e aos seus compañeiros.