As graves mudanzas que se están a observar nos ecosistemas litorais, afectando incluso a núcleos urbanos, son debidos a unha combinación da elevación do nivel do mar e a transformación destes medios polo home. A sucesión de temporais invernais, que se están a suceder nos últimos anos, provocan unha visibilización de danos ocasionados polo avance do mar. Porén, estes danos non son só debidos a intensificación dos fenómenos climáticos senón tamén ao efecto do desenvolvemento urbano coa construcción de paseos marítimos, espigóns, peiraos de abrigo o efecto de retección de sedimentos de encoros,  que provocan unha mudanza na dinámica de correntes e unha reducción no aporte de sedimentos, intensificandose o poder erosivo do mar.

No pasado mes de marzo a RTP emitía unha reportaxe de José Manuel Levy  sobre o efecto do avance de mar (http://www.rtp.pt/play/p1471/e146681/reportagem), no que se discute a necesidade do reordenamento do territorio e a eficacia de inversións para tentar reducir o efecto destes problemas.

Un aspecto a considerar nos planos de xestión e rexeneración destes ecosistemas litorais é a presenza de especies raras e ameazadas que están a ser afectadas directamente por estes procesos erosivos. Por exemplo especies protexidas polo Catálogo Galego de Especies Ameazadas como Crepis novoana, Rumex rupestris, Linaria aguillonensis, Chaetopogon fasciculatus subsp. postratus están sendo afectadas directamente por esta problemática. Como medidas de actuación para a conservación destas especies debería realizarse un seguimento das súas poboacións e incrementar o esforzo na conservación de material ex situ.