A custodia do territorio é un conxunto de estratexias e ferramentas que pretende implicar ós propietarios e usuarios do territorio na conservación e o bo uso dos valores e recursos naturais, culturais e paisaxísticos. Para conseguilo, promove acordos e mecanismos de colaboración continua entre os propietarios, entidades de custodia e outros axentes públicos e privados. Entre as distintas asociacións que promoven este tipo de modelo para a protección do medio, falamos hoxe da Asociación Galega de Custodia do Territorio.

Esta asociación nace en Rábade (Lugo) o 26 de abril de 2008, coa inquedanza de  conservar e recuperar o patrimonio natural empregando a custodia do territorio, un modelo que apenas se estaba a empregar en Galiza. O seu obxectivo principal pois difundir e fomentar a utilización desta ferramenta entre os axentes implicados e a sociedade en xeral, facéndoos partícipes da xestión sustentábel do territorio.

Deste modo, son as persoas, e non as administracións, as que co seu esforzo e traballo realizan actividades para mellorar o estado de conservación da natureza. A restauración das carballeiras na Terra Cha, o mantemento dos bosques dos Ancares, a preservación das orquídeas do Courel e moitos outros proxectos son proxectos desenvolvidos por esta entidade co apoio dos seus socios e simpatizantes.

Outras actividades que organiza esta asociación son as enfocadas á educación ambiental. Actividades que se desenvolve principalmente na Casa das Insuas, edificio monumental situado na ribeira do río Miño ó seu paso por Rábade (Lugo). Enclavado nun lugar de singular beleza e interese ambiental, sitúase nas proximidades das Insuas do Miño, zona de maior interese e protección da Rede Natura 2000 e da Reserva da Biosfera de Terras do Miño. Dende esta privilexiada situación tratan de divulgar o enorme interese que ten para a sociedade a conservación do noso patrimonio natural.

Páxina web: custodiadoterritorio.org

Blog da Casa das Insuas: casadasinsuas.org

Correo electrónico: custodiadoterritorio@gmail.com