En territorios moi humanizados coma é o caso do noso, a xestión dos recursos naturais e a conservación da natureza deben ter en conta os factores sociais. Cuestións coma o uso e a propiedade da terra ou as actitudes dos distintos sectores de poboación cara as políticas territoriais e de xestión da biodiversidade e a paisaxe son factores clave á hora de afrontar con éxito programas de conservación da natureza.
A custodia do territorio é un instrumento para a conservación da natureza e a paisaxe que promove a participación dos propietarios dos terreos, a sociedade civil organizada, a cidadanía e incluso empresas privadas, e ten un carácter complementario e non substitutivo doutras iniciativas e políticas públicas que buscan preservar a biodiversidade e a paisaxe. Máis aló dun concepto falamos dun conxunto de técnicas e estratexias diversas dirixidas a favorecer a corresponsabilidade dos propietarios e a sociedade en xeral, na conservación e o uso axeitado do territorio e os recursos naturais.
o III Encontro Galego de Custodia do Territorio será un espazo para o aprendizaxe e fortalecemento das entidades galegas que empregan a custodia do territorio como ferramenta de conservación da natureza e a paisaxe. Contarase coa participación de profesionais dos sectores forestal, agrario e xurídico que analizarán distintos aspectos relativos á conservación do patrimonio natural e paisaxístico a través da custodia do territorio. Así mesmo contarase coa presenza de expertos en Custodia do Territorio no ámbito nacional. O primeiro día do encontro, proxectarase o documental “ A Mesma Terra”, unha produción de Fonsagrada Producións (do grupo Fílmax, creadores do programa Cos pés na terra) e Televisión de Galicia, realizado por Iago Mazoy, con guión de Anxo Vázquez, Iago Mazoy e Pepe Coira". Isto será o punto de partida dunha reflexión colectiva sobre o abandono de terras en Galicia e as súas implicacións na conservación da natureza e a paisaxe. Consideramos que o contido deste documental que presenta de forma moi acertada a idiosincrasia e a problemática, social, económica e ambiental, do abandono de terras no noso País, pode servir de fío argumental para tratar de debullar os principais retos territoriais aos que se enfronta a custodia do territorio en Galicia. Neste senso, plantexamos unha xornada inagural, onde o documental teña un papel central e introduza un debate onde contaremos con algúns dos expertos entrevistados na película e outros expertos que complementen as análises verquidas neste traballo.
O III Encontro Galego de Custodia do Territorio celebrarase no Centro de Conservación e Estudo da Natureza Casa Das Insuas que é un centro de recursos autoxestionado por e para entidades e persoas con inquedanza polo coñecemento e conservación do medio natural. A Asociación Galega de Custodia do Territorio impulsou e xestiona este centro, no que tamén participan outras entidades naturalistas.

Máis información en: custodiadoterritorio@gmail.com ou no tfn: 620593892