O grupo naturalista Hábitat nos fai chegar info destas actividades para o fin de semana. 

Roteiro en Punta Herminia (A Coruña)

O sábado 3 de outubro de 11:30 a 13:30 horas, colaboraremos xunto á Sociedade de Montaña Ártabros nesta iniciativa enmarcada no "Festival Mar de Mares", que pretende poñer de manifesto a importancia dos océanos e dos seus ecosistemas como fonte de riqueza natural, e a necesidade da súa conservación.

Mediante un roteiro interpretativo, poñeremos en valor a riqueza natural deste fermoso espazo e exporemos a problemática derivada da presenza de plásticos nas nosas augas e o seu impacto na biodiversidade.

A actividade é de balde e aberta á participación cidadá, sendo o punto de saída no centro de visitantes da Torre de Hércules.

Día das Aves 2015

Con motivo do "Día mundial das aves", organizamos unha actividade dirixida a informar e axudar a identificar as aves presentes no noso contorno, aprendendo os seus rasgos e características, e aproveitando para promover o aprendizaxe no uso de material óptico e guías de campo, esenciais para o seu goce.

Será a mañá do domingo día 4 de outubro, de balde e aberta á participación cidadá. Tendo en conta a previsión meteorolóxica, propoñemos dúas alternativas:
- Se o tempo acompaña, teremos unha xornada de observación de aves no campo, de 10 a 13 horas, en tres puntos da bisbarra: O Portiño e Punta Herminia (A Coruña), e Encoro de Cecebre (Abegondo).

- Se o tempo non acompaña, desenvolveremos un obradoiro de divulgación sobre aves de 11:30 a 13 horas no local do G.N.Hábitat (rúa Camariñas 8, baixo. 15002, A Coruña). Farase só se non é posible sair ao campo, cuestión que será decidida polos organizadores.

É imprescindible anotarse (ver información detallada na nosa web) para garantir unha boa organización da actividade.

Agardámosvos para gozar do noso medio!