O 18 de xuño do 2016 invitámosvos á participar no BioBlitz das Insuas do Miño, un dos maiores espazos en custodia do territorio de Galicia.

Un BioBlitz (BioLóstrego) consiste nunha xornada de campo co obxectivo de descubrir a maior cantidade de especies que habitan un determinado lugar. As Insuas do Miño son un lugar excepcional para realizar esta actividade debido á gran biodiversidade que podemos atopar nas súas ribeiras, bosques e prados, xa que se encadra na cunca alta do río Miño, cerne do ZEC Parga-Ladra-Támoga e da Reserva da Biosfera de Terras do Miño.

As Insuas do Miño son un dos maiores espazos en custodia do territorio de Galicia con máis de 100 ha de bosques e prados propiedade da Deputación Provincial de Lugo e que a AGCT xestiona mediante un acordo de custodia.

Durante esta actividade, buscaremos a maior cantidade de especies de flora e fauna que habitan as Insuas e realizaremos un inventario completo da súa biodiversidade. Tamén se realizarán fotografías das especies que non poidamos identificar para poder subilas á plataforma de Biodiversidade Virtual para a súa identificación por expertos.

Inscricións  en http://bit.do/BioBlitzInsuas. Máis info en custodiadoterritorio@gmail.com/630-94.82.93.