Esta especie invasora está amplamente extendida en solos alterados e de cultivo, pero nunca me tiña chamado tanto a atención en sistemas dunares. Nesta zona, en xeral aparece dispersa nas proximidades das pasarelas que percorren as dunas das praias de Río Sieira e Xuño, con maior concentración nas proximidades do aparcamento que se sitúa entre estos areais. A dispersión dos exemplares da especie conforme nos alonxamos da zona do aparcamento, induce a pensar que está en expansión. Na praia de río Sieira xa se localizan núcleos nos que esta especie ocupa varios metros cadrados do que debería ser duna gris. Haberá que permanecer atento a evolución destes núcleos e observar se se trata dunha colonización favorecida por algún tipo de alteración recente no sistema dunar, (como o propio efecto da instalación das pasarelas), ou si realmente esta especie ten capacidade para colonizar e desplazar á vexetación propia das dunas. Un estudio recente sobre o O. pes-caprae, asinado polos investigadores da Universidade de Vigo, Victoria Ferrero e Luis Navarro, xunto con equipas das universidades de Coimbra e Toronto, vén de ser aceptado para publicación en Molecular Ecology. (Consultable en http://goo.gl/pPsojG) Neste traballo salientan que a variabilidade xenética observada nas poboacións introducidas de O. pes-caprae é maior da que se presupón para unha especie de crecemento clonal. Esta variabilidade xenética, que indican pode deberse a multiples introduccións ou recombinación, implica unha maior plasticidade desta especie para a adaptación a todo tipo de medios.