Estimados amigos:

As poboacións de Juniperus communis subsp. alpina (xenebreiro) situadas na zona do Pico Cuiña, nos Ancares, presentan un estado preocupante, cando menos. Alguns pés están mortos e outros moi tocados. Penso que a causa pode ser o exceso de presión que exercen sobre eles as especies de ungulados introducidas con fins cinexéticos hai uns 15 anos, coido que por parte da administración autónoma de Castela-León. Rebezos e cabras montesas aumentaron o seu número considerablemente nos últimos anos para deleite de cazadores e amantes da natureza, mais supoñen unha ameaza para un ecosistema que dende facía moito tempo non soportaba esta presión. O problema agrávase porque estas poboacións de herbívoros viven prácticamente todo o ano nunha área non moi extensa, apenas unhas decenas de hectáreas.

Coido que sería bon que algún botánico botara unha ollada, especialmente na zona comprendida entre o pico Cuiña e o Dos Hermanitos, para ver se realmente existe un problema serio. De ser así, xa habería que poñerse en contacto cos xestores das dúas reservas de caza, a dos Ancares galegos e a dos Ancares leoneses.