Hai unhas semanas os blogueiros de AXENA denunciaban a tala de parte da Devesa de Santa Leocadia. A tala realizouse en máis de 1 hectárea das aproximadamente 30 que ocupa este bosque, con dúas zonas afectadas. Na marxe dereita do río, xusto por detrás da capela de Santa Leocadia obsérvase todavía un balizado que delimitaba unha faixa duns 50 metros á beira do río sinalando o límite para a tala,  así como algúns exemplares de  carballo dispersos ao longo da finca, que deberon ser os mínimos esixidos polo permiso de tala. A faixa de protección do río e o número de carballos respetados na corta resultan insuficientes para esta zona na que se localizan as poboacións dos fentos ameazados Woodwardia radicans, Dryopteris guanchica e Hymenophyllum tunbrigense. Descoñecemos se o permiso xa fixaba estes mínimos insuficientes ou si ben se deben a unha interpretación libre dos responsabeis da tala, mais esta cuestión debería ser esclarecida polas autoridades competentes. As autorizacións de aproveitamento neste tipo de medios deberían ser moi restrinxidas, e no caso de ser concediadas contemplar claramente que non se deben abrir claros excesivos na cobertura de copas, co fin de manter o equilibrio do medio.  Como resultado da tala obsérvase que a incidencia solar nas paredes onde se localizan a Woodwardia radicans e Dryopteris guanchica é elevada, polo que estes núcleos poboacionais poden estar nun grave risco de desaparición.

Por outra banda, na marxe esquerda do río, a tala afectou principalmente a un eucaliptal, mais neste caso en algún punto nin siquera se respetou unha franxa de vexetación no entorno do rego, provocando derrubamentos nunha das paredes verticais onde medra a Woodwardia radicans.

Logo desta actuación para minimizar os seus efectos debería desenvolverse un programa de restauración, que contemple tarefas de seguimento da evolución das poboacións dos fentos ameazado, actividades  para favorecer a rexeneración natural da fraga e control das reforestacións e da chegada de especies exóticas.

Asimesmo nun espazo, no que a estructura da propiedade semella corresponder a pequenas fincas de xestión privada, sería de interese establecer convenios de xestión con estes propietarios para a xestión sostible deste bosque e a conservación dos seus valores naturais.