Colabora connosco
Biodiversidade.eu é unha plataforma que pretende difundir de forma participativa a importancia do patrimonio natural do noroccidente ibérico, a súa orixe é un proxecto transfronteirizo Galiza-Norte de Portugal, un territorio que comparte características naturais e culturais específicas, mantendo como obxectivo úlitmo a conservación do patrimonio natural.
Esta base de datos ofrécese como un punto de consulta xeorreferenciada dos valores naturais, iniciativas de conservación e ameazas existentes no territorio, sendo tamén un espazo onde as persoas usuarias poden organizar proxectos de forma autónoma, nos que é posible implicar de forma activa á cidadanía.
Esta plataforma naceu do proxecto BIODIV_GNP, financiado con Fondos FEDER da convocatoria POCTEP 2007-2013 e, no momento actual, non conta con financiamento nen de organismos públicos nen privados. O grupo de investigación da USC “Biodiversidade e Conservación de Plantas Vasculares”, que é promotor deste proxecto, ten o compromiso de buscar novas fontes de financiamento, que posibiliten facer melloras e avanzar na construcción deste lugar de encontro para os axentes implicados na conservación do noso medio natural, así como garantir a autonomía deste espazo web, de xeito que as decisións sobre o mesmo só dependan da comunidade de persoas usuarias.
Creamos este apartado de achegas directas co obxectivo de tentar acadar un mínimo anual, que nos permita atender os traballos técnicos requeridos polas incidencias na web e o seu mantemento básico, así como avanzar con pequenas melloras suxeridas polas persoas que participan nela.
Como podes colaborar?
As achegas poden realizarse a través de botón doar en dúas modalidades :
- Unha suscripción de apoio mensual.
- Unha achega puntual.
Non hai unha cantidade mínima de achega, dende menos de 1 € podes contribuír coa construcción desta ferramenta colectiva de estudio e conservación da biodiversidade.
E a que se adicarían os fondos acadados?
Estas achegas irán directamente para mantemento técnico e deseño de novas ferramentas en www.biodiversidade.eu. Na sección contas, informaremos das achegas recibidas e a correspondente execución de gastos.
No momento actual, a administración da web é partillada entre a Asociación Biodiversidade e o Grupo de investigación “Análise e Conservación da Biodiversidade” da USC de forma altruísta. É a asociación a encargada de xestionar as achegas recibidas e planificar os futuros desenvolvimentos. Para isto conta coa axuda e suxestións de numerosas persoas da comunidade de colaboradores Calquera modificación económica será comunicada nos estados de contas que se irán publicando.