Tres exemplares do Lirio do Xurés (Xiphion boissieri)especie considerada "En Perigo de Extinción" e incluida no Catálogo Galego de Especies Ameazadas, foron localizados o pasado sábado no camiño de subida á Moa dende O Fieiro . Non se tiña constancia da presencia da especie nesta parte do monte, o que pon de manifesto que unha procura intensiva debe ser realizada para coñecer o verdadeiro estado desta poboación.
A especie chegou a considerarse extinta nesta localidade, pero grazas ao esforzo da Asociación Monte Pindo, localizáronse algúns individuos isolados da especie nos anos 2012 e 2013. Descoñecemos si esta observación é a primeira logo do fatal incendio que asolou o Monte Pindo o pasado ano, pero a supervivencia deste endemismo de Galiza e Norte de Portugal no seu entorno é unha excelente nova.
A lexislación contempla a creación dun plano de restauración e recuperación para a conservación das especies vexetais incluidas no Cátálogo Galego, desexamos que este plano non chegue demasiado tarde para esta poboación e que o seu desenvolvemento contribúa á recuperación deste espazo natural.
A información da observación en http://biodiversidade.eu/avistamento/iris-boissieri-henriq-34/