O PROXECTO

Biodiversidade.eu é unha plataforma de traballo colaborativa onde partillar os coñecimentos sobre as especies e hábitats naturais de Galiza, Portugal e occidente ibérico, unha ferramenta coa que toda a cidadanía pode contribuír á conservación destes recursos naturais. 

A orixe

Biodiversidade.eu ten a súa orixe nunha iniciativa do Grupo de Investigación Análise e Conservación da Biodiversidade da Universidade de Santiago, a través do proxecto “Biodiversidade Vexetal Ameazada de Galiza e Norte de Portugal (BIODIV_GNP)” e co financiamento dos fondos FEDER do Programa Operativo de Cooperación Transfronteiriza Galiza-Norte de Portugal (POCTEP 2010-2013). 

É neste proxecto , no que participan a Universidade de Santiago, Universidade de Porto, Xunta de Galicia, Fundação Fernão Magalhães e Fundación CEER, no que se deseñan as ferramentas da páxina web a través dun contrato coa empresa A Navalla Suíza. No proxecto se xera tamén un primeiro corpo de datos de elevado interese co volcado da información existente sobre a flora ameazada e endémica de Galiza, Norte de Portugal e limítrofes. 

Ao remate do proxecto no 2015 tíñanse rexistrado máis de 250 participantes e a base de datos contaba xa con un total de 15000 rexistros. 

O G.I. Análise e Conservación da Biodiversidade “ACBiodiv” da Universidade de Santiago continuou a xestionar esta plataforma, ao tempo que procuraba financiamento para afrontar as adaptacións tecnolóxicas derivadas da evolución de novas ferramentas informáticas, así como a demanda de melloras de usabilidade por parte das persoas colaboradoras. 

Por outra banda, no proxecto establecíase que a continuidade desta plataforma se garantiría a través da comunidade creada en torno a biodiversidade.eu. Así no ano 2017, despois de barallar distintas opcións, os membros do grupo de investigación e varios usuarios promotores da páxina web impulsaron a creación da Asociación Biodiversidade con este obxectivo. Entre os promotores estaban representantes do G.I. ACBiodiv, de ADEGA e da AGCT, así como usuarios individuais.

A Asociación Biodiversidade

A Asociación Biodiversidade constitúese en Santiago de Compostela en Decembro do ano 2017 coa finalidade de dinamizar a plataforma biodiversidade.eu e establecer un espazo no que as persoas usuarias podan participar na toma de decisións. Desde ese momento, o mantemento e xestión da páxina web depende exclusivamente desta Asociación, se ben os promtores iniciais manteñen o seu compromiso de apoio.

Os estatutos da asociación establecen nove obxectivos a desenvolver. Estes obxectivos son oeixo actual do proxecto:

1) Fomentar o estudo e coñecemento da biodiversidade, especialmente co fomento da participación cidadá.

2) Tecer redes de colaboración con entidades científicas, asociacións e administracións públicas con interese no fomento do coñecemento e a conservación da biodiversidade.

3) Colaborar na denuncia das agresións medioambientais rexistradas no noso entorno e na resolución dos seus problemas de forma participada e cívica.

4) Promoción e organización de actividades para o descobrimento da biodiversidade e a súa protección.

5) Divulgación da importancia do coñecemento xerado a través desta plataforma.

6) Promover estudos de investigación e proxectos dirixidos á conservación e recuperación do patrimonio natural.

7) Promover o estudo e inventariado do patrimonio histórico-cultural ligado ao patrimonio natural, tanto material como inmaterial

8) Impulsar e colaborar con iniciativas de custodia do territorio, creación e xestión de microrreservas e outras figuras de espazos naturais protexidos, como ferramentas para a conservación do patrimonio natural de Galiza.

9) Favorecer e fomentar o desenvolvemento e implementación de novas funcionalidades e aplicacións na plataforma web que puideran ser desenvolvidas por outras entidades, grupos de traballo ou de investigación.

Se queres asociarte contacta connosco en info@biodiversidade.eu. Desde 1 €/mes podes participar na construcción desta ferramenta e no desenvolvimento de actividades para a conservación da nosa biodiversidade. Máis info no botón Colabora connosco