Euphorbia amygdaloides L. subsp. amygdaloides = E. sylvatica Jacq. Planta de orla e interior de carballeiras ou de bosque caducifolio mixto, característica da clase Querco-Fagetea, e que crece sobre solo fresco e profundo, en lugares máis ou menos sombrizos. Trátase dunha especie frecuente no Barbanza, común no seu hábitat. O rasgo distintivo desta euforbiácea, que pode superar o metro de altura, consiste en que as brácteas dos radios secundarios da umbela (bracteolas) aparecen cada par soldadas entre si ata a metade da súa lonxitude. O epíteto específico fai referencia á forma destas bracteolas, que recordan á das amígdalas. Como todas as representantes desta familia (nas nosas especies), segrega un látex de cor branca ao romperse, daí algúns dos nomes populares galegos: leiterena, leiteriña (en castelán, “lechetrezna”).